کراچی(31 مئی) پاکستان پیپلزپارٹی سندھ کے سیکریٹری اطلاعات سینیٹر عاجز دھامراہ نے نوازلیگ رہنما سینیٹر نہال ہاشمی کی جانب سے پاناماکیس کی جے آئی ٹی میں شامل افسران کو دھمکیاں دینے پر شدیدردعمل کا اظہار کرتے ہوئے کہا ہے کہ نہال ہاشمی کی تصویرکے پیچھے نوازشریف اور چودھری نثار کی زبان بولی جارہی ہے، جاری کردہ بیان میں سینیٹر عاجز دھامراہ نے کہا کہ یہ کوئی نئی بات نہیں ہے، عدالتوں پر حملہ نواز شریف کا وطیرہ رہا ہے، نہال ہاشمی کی دھمکیوں سے لگتا ہے کہ نواز شریف اور ان کے چہیتے اعلیٰ عدلیہ پر حملے کی منصوبہ بندی کر رہے ہیں، سینیٹر عاجز دھامراہ نے کہا کہ خود ایک آمر کے سامنے گھٹنے ٹیک کر تحریری معاہدہ کرکے ملک سے بھاگنے والے آج دوسروں کو ملک میں جینا حرام کرنے کی دھمکیاں دے رہے ہیں، نہال ہاشمی نے حساس اداروں اور اعلیٰ عدلیہ کے افسران کو کھلی دھمکیاں دی ہیں اگر نہال ہاشمی کا تعلق پیپلزپارٹی سے ہوتا تو اب تک اس کے خلاف ازخود نوٹس بھی آجاتا۔