اسلام آباد

سابق صدر پاکستان اور پاکستان پیپلزپارٹی پارلیمینٹیرینز کے صدر آصف علی زرداری نے دوحہ ایئرپورٹ پر پھنسے پاکستانیوں کو درپیش مشکلات پر تشویش کا اظہار کرتے ہوئے حکومت پاکستان سے کہا ہے کہ وہ ترجیحی بنیادوں پر اہل وطن کی بحفاظت وطن واپسی کے اقدامات کرے۔ آصف علی زرداری نے کہا کہ یہ حکومت کی ذمے داری ہے کہ ملک کے شہریوں کے تحفظ کو یقینی بنائے۔ سابق صدر نے کہا کہ ایک طرف پاکستانی دوحہ ایئرپورٹ پر مشکلات کا شکار ہیں اور دوسری طرف ان کے خاندان اور رشتے دار پریشان ہیں۔ آصف علی زرداری نے کہا کہ جتنا جلد ممکن ہوسکے دوحہ ایئرپورٹ پر پھنسے ہوئے پاکستانیوں کی وطن واپسی کو ممکن بنایا جائے۔