اسلام آباد(4فروری 2018)
سابق صدر پاکستان اور پاکستان پیپلز پارٹی پارلیمنٹیرینز کے صدر آصف علی زرداری نے یوم کشمیر کے موقع پر کہا ہے کہ پاکستان پیپلزپارٹی کشمیریوں کی حمایت جاری رکھے گی۔ انہوں نے بہادر کشمیریوں کی عظیم جدوجہد کو خراج تحسین پیش کرتے ہوئے کہا کہ اقوام متحدہ کو چاہیے کہ وہ اس مسئلے کے حل کے لئے ٹھوس اقدامات لے تاکہ کشمیریوں پر مصائب کا خاتمہ ہو اور خطے میں امن قائم ہو۔ انہوں نے کہا کہ سات دہائیوں پہلے کشمیریوں سے کیا گیا وعدہ پورا نہیں کیا گیا اور اب وقت آگیا ہے کہ اقوام متحدہ اپنے وعدے کو پورا کرے اور کشمیریوں کو حق خود ارادیت دلائے۔ انہوں نے کہا کہ ایسا کرنا خطے اور عالمی امن کے لئے اشد ضروری ہے۔ یوم کشمیر کے موقع پر اپنے پیغام میں سابق صدر نے کہا کہ حق خودارادیت بنیادی حقوق میں سے ایک ہے جو اقوام متحدہ کے چارٹر میں بھی موجود ہے اور اس حق کو تاخیری یا کسی اور حربے سے غصب نہیں کیا جا سکتا۔ پاکستان پیپلزپارٹی عوام کے بنیادی حقوق کے احترام کے لئے مخلص ہے اور چاہتی ہے کہ کشمیر کا ایک منصفانہ، پرامن اور باعزت حل نکلے جو کشمیریوں کی آرزوﺅں اور امنگوں کے مطابق ہو۔ سابق صدر نے کشمیریوں کی عظیم جدوجہد کے دوران قربانیاں دینے والوں کو زبردست خراج عقیدیت اور خراج تحسین بھی پیش کیا۔ انہوں نے کہا کہ ہم اقوام متحدہ کی جانب سے کروڑوں لوگوں کو آزدی دلانے اور دنیا سے نوآبادیات ختم کرنے کا خیرمقدم کرتے ہیں لیکن ہم اس بات پر حیرت زدہ ہیں کہ سات دہائیوں سے مسئلہ کشمیر اب تک حل نہیں ہو سکا۔