کراچی (27 فروری 2018) پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان کو پرامن، خوشحال اور ترقی پسند ملک بنانے کے لیئے لوگوں کے پاس پی پی پی کے علاوہ دوسرا کوئی آپشن نہیں۔ انہوں نے پارٹی کے منتخب نمائندوں، رہنماوَں اور کارکنان پر زور دیا کہ وہ ملک بھر میں بھرپور الیکشن مہم چلانے کے لیئے تیار ہوجائیں۔ ان خیالات کا اظہار انہوں نے بلاول ہائوس میں ارکان سندہ اسمبلی کے اعزاز میں منعقد عشائیہ سے خطاب کرتے ہوئے کیا۔ پی پی پی شعبہ خواتین کی مرکزی صدر فریال تالپور، آصفہ بھٹو زرداری، پی پی پی سندھ کے صدر نثار احمد کھڑو، وزیراعلیٰ مراد علی شاہ، اسپیکر آغا سراج درانی، سینیٹر شیری رحمان، مولابخش چانڈیو، اورپارٹی کے دیگر سینیئر رہنماوَں سمیت صوبائی وزراء، ارکان اسمبلی اور سینیٹ کے لیئے پارٹی امیدوارن نے شرکت کی۔ پی پی پی چیئرمین نے کہا کہ سندہ میں ہونے والی ترقی کے متعلق دیگر صوبوں کی عوام کو آگاہ کرنے کی ضرورت ہے، کیونکہ گذشتہ پانچ سالوں کو دوران ماسوائے سندہ دوسرا کوئی صوبہ اس طرح صحت کی سہولیات فراہم نہیں کرسکا، نہ تعلیم کے شعبے میں ایسی نمایاں کارکردگی ہے، جسے علمی سطح پر بھی تسلیم کیا گیا ہو، اور نہ نچلی سطح تک روڈ نیٹ ورک بچھایا گیا ہے۔ بلاول بھٹو زرداری نے کہا کہ لوگوں کو اس بیانیئے میں کوئی دلچسپی نہیں کہ “مجھے کیوں نکالا”، کیوںکہ وہ غربت، بیروزگاری اور دہشتگردی کو جھیل رہے ہیں۔ طالبان کو معافی دینے والے جو پی ٹی آئی کے عمران خان کی زیرقیادت جا کر جمع ہوئے ہیں، وہ بھی عوام کے لیئے متبادل نہیں ہیں کیونکہ وہ بھی تعلیم اور اوقاف کے فنڈز دہشتگردی کے اسپانسرز کو دے کر عوام کے آگے بے نقاب ہوچکے ہیں اور خیبرپختونخواہ میں کچھ بھی ڈلیور نہیں کیا۔ انہوں نے کہا کہ پی پی پی ان پاکستانیوں کے لیئے واحد آپشن ہے، جو ملک میں امن، خوشحالی اور ترقی چاہتے ہیں۔ انہوں نے کہا کہ آئیے پارٹی کا پیغام ملک کے طول وعرض میں پھیلائیں کہ وہ فقط پی پی پی ہے، جو پاکستان کے خلاف عالمی سازشوں کا مقابلہ اور انہیں ناکام بنا سکتی ہے۔ فقط پی پی پی ہی خارجہ پالیسی دے سکتی ہے، جو ملک کو آئسولیشن سے نکال سکتی ہے اور دنیا میں ملک کا باوقار مقام بحال کرا سکتی ہے۔ بلاول بھٹو زرداری نے مزید کہا کہ ملک کا آئندہ وزیراعظم اور تمام صوبوں کے وزرائے اعلیٰ پیپلز پارٹی کے ہونگے۔ انہوں نے پارٹی کے رہنماوَں پر زور دیا کہ وہ آئندہ انتخابات کے لیئے بھرپور محنت کریں۔