سابق صدر پاکستان اور پاکستان پیپلزپارٹی پارلیمنٹیرینز کے صدر آصف علی زرداری نے قومی اسمبلی میں قائد حزب اختلاف شہباز شریف کو رہائی پر مبارکباد دی ہے۔ آصف علی زرداری نے مسلم لیگ (ن) کے عہدیداروں اور کارکنوں کو بھی شہباز شریف کی رہائی پر مبارکباد دیتے ہوئے کہا ہے کہ شہباز شریف کی رہائی جمہوریت کے لئے نیک شگون ہے۔ انہوں نے کہا کہ پاکستان پیپلزپارٹی کی حکومت میں ملک بھر میں کوئی بھی سیاسی قیدی نہیں تھا اس لئے کہ پاکستان پیپلزپارٹی انتقام کی سیاست پر یقین نہیں رکھتی۔ انہوں نے کہا کہ پارلیمنٹ کو بااختیار بنانے کے لئے آواز بلند کرتے رہیں گے۔ آصف علی زرداری نے کہا کہ اختلاف رائے جمہوریت کا بنیادی جزو ہے۔ صرف الزام کی بنیاد پر کسی کو جیل میں بند رکھنا مناسب بات نہیں۔ الزامات کی سیاست سے ملک کا نقصان ہوتا ہے۔ آصف علی زرداری نے کہا کہ اٹھارہویں ترمیم سے وفاق مضبوط اور مستحکم ہوا۔ آئین کی حفاظت کرنا ہم سب کا فرض ہے۔