پاکستان پیپلز پارٹی شعبہ خواتین کی مرکزی صدر و رکنِ سندھ اسمبلی فریال تالپور سے خاندان کے افراد اور ان کے وکلاء نے اڈیالا جیل میں ملاقات کی، رکنِ قومی اسمبلی میر منور تالپور نے خاندان کے دیگر افراد کے ہمراہ اپنی اسیر اہلیہ فریال تالپور سے ملاقات کی۔ سابق صوبائی وزیر ضیاء الحسن لنجار اور وکلا ٹیم، غلام مصطفیٰ لغاری اور خانبھادر بھٹی نے فریال تالپور سے اڈیالا جیل ملاقات کی۔ ضیاء الحسن لنجار نے کہا کہ بی کلاس کے نوٹیفیکیشن کے باوجود جیل انتظامیہ کی جانب سے تاحال فریال تالپور کو سہولیات میسر نہیں کی گئیں، جبکہ پروڈکشن آرڈر جاری کیئے جانے کے باوجود فریال تالپور کو سندھ اسیمبلی کے اجلاس میں نہیں لایا گیا۔ انہوں نے مزید کہا کہ فریال تالپور کی اجلاس میں شرکت کے متعلق سندھ اسیمبلی نے قرارداد بھی منظور کی ہے، لیکن اڈیالا کی جیل انتظامیہ نہیں مانی۔ ضیا الحسن لنجار نے مزید کہا کہ پنجاب کی جیل انتظامیہ سندھ کے عوام کی منتخب اسمبلی کی توہین کر رہی ہے۔ انہوں نے کہا کہ پیر کے روز اعلی عدالت میں پیٹیشن دائر کی جائیگی۔