پاکستان پیپلز پارٹی کے چیئرمین بلاول بھٹو زرداری نے مخدوم محمد الزمان طالب المولیٰ کی برسی کے موقع پر انہیں زبردست خراج عقیدت پیش کرتے ہوئے کہا ہے کہ وہ روحانیت، سیاست اور ادب کے میدان میں ایک ہمہ گیر شخصیت تھے۔ میڈیا سیل بلاول ہاو ¿س سے جاری کردہ پریس رلیز کے مطابق، پی پی پی چیئرمین نے اپنے پیغام میں کہا کہ مخدوم طالب المولیٰ ایک بلند پایہ شخصیت تھے جنہوں نے اپنی زندگی انصاف، جمہوریت اور انسانی وقار کے اصولوں کے لیے وقف کردی۔ وہ نہ صرف ایک روحانی اور سیاسی رہنما تھے بلکہ ایک منفرد شاعر بھی تھے جن کی شاعری انسانیت، ایمان اور زندگی کی حقیقتوں پر گہری سوچ کی عکاس ہے۔ چیئرمین بلاول بھٹو زرداری نے پاکستان پیپلز پارٹی کے اصولوں کے ساتھ مخدوم طالب المولیٰ کی ثابت قدمی کی تعریف کرتے ہوئے کہا کہ ان کی جدوجہد قائدِ عوام شہید ذوالفقار علی بھٹو اور شہید محترمہ بینظیر بھٹو کے شانہ بشانہ جمہوریت کی بحالی اور استحکام کے لیے بے مثال رہی۔انہوں نے مزید کہا کہ آج ہم مخدوم محمد الزمان طالب المولیٰ کی شاندار قربانیوں اور خدمات کو یاد کرتے ہوئے جمہوری اقدار کے لیے ان کی انتھک جدوجہد اور ان کی دانشمندی سے رہنمائی حاصل کرتے ہیں۔ ان کی میراث آج بھی ہمیں رہنمائی اور تحریک فراہم کرتی ہے۔