صدر مملکت آصف علی زرداری نے خواتین کے عالمی یوم نسواں کے موقع پر کہا کہ ہم خواتین کی استقامت ، معاشرتی تشکیل و ترقی میں کردار کے اعتراف کیلئے عالمی یومِ نسواں منا رہے ہیں۔ اس سال کا عالمی یومِ نسواں کا عنوان ہر خاتون کے حقوق اور مواقع تک مساوی رسائی یقینی بنانے کی اہمیت پر زور دیتا ہے۔ انہوں نے کہاکہ خواتین ہماری آبادی کا تقریباً نصف حصہ ہیں اور خواتین کو بااختیار بنانا ہماری قومی ترقی کے لیے ناگزیرہے۔ خواتین کو مساوی حقوق ، مواقع دینے والے معاشرے زیادہ خوشحال، پرامن اور پائیدار ہوتے ہیں اور خواتین کو تعلیم، معاشی مواقع اور قائدانہ کردار تک رسائی دینا پوری قوم کیلئے سودمند ہے۔ بہت سی خواتین کو اب بھی تشدد، امتیازی سلوک اور انکی بھرپور معاشرتی شمولیت میں رکاوٹوں کا سامنا ہے۔ ہمیں ایک ہمہ جہت اور مساوات پر مبنی معاشرہ تشکیل دینا ہے۔ انہوں نے کہا کہ خواتین کے تحفظ، تعلیم اور معاشی آزادی کیلئے پالیسیاں بہتر بنانے کیلئے مزید اقدامات کرنے کی ضرورت ہے۔ کاروباری اور نجی شعبے کو خواتین کیلئے مساوی مواقع، منصفانہ ا ±جرت اور کام کیلئے محفوظ ماحول فراہم کرنا چاہیے۔ پاکستان آئینی دفعات ، بین الاقوامی معاہدوں کے مطابق خواتین کے حقوق کے فروغ کے لیے پرعزم ہے۔ انہوں نے کہا کہ گزشتہ کچھ سالوں میں ہم نے گھریلو تشدد، کام کی جگہ پر ہراسانی اور صنفی امتیاز کے خلاف قوانین کے نفاذ سمیت کلیدی اقدامات کیے۔ صنفی بنیاد پر تشدد سے بچ جانے والوں کے لیے خصوصی عدالتوں اور ہیلپ لائنز کے قیام سے خواتین کے تحفظ میں مدد ملی ہے۔ پاکستان نے سیاست، عدلیہ، قانون نافذ کرنے والے اور دیگر سرکاری اداروں میں خواتین کی نمائندگی بڑھانے کے لیے اقدامات کیے۔ خواتین کی مالیاتی شمولیت، کاروبار ی سرگرمیوں اور ڈیجیٹل خواندگی کے فروغ کے لیے معاشی اقدامات لیے گئے۔ صدر مملکت نے کہا کہ آئیے ، اس عالمی یومِ نسواں پر ہر خاتون کو بااختیار بنانے کے عزم کا اعادہ کریں ۔