پاکستان پیپلز پارٹی کے چیئرمین بلاول بھٹٹو زرداری نے پورٹ قاسم اتھارٹی میں سی بی اے یونین کے انتخاب میں پیپلز لیبر یونین کی بھاری اکثریت سے کامیابی پر تشکر کا اظہار کرتے ہوئے اسے پورٹ قاسم اتھارٹی سے منسلک محنت کشوں کی فتح قرار دیا ہے۔ میڈیا سیل بلاول ہاوَس سے جاری کردہ پریس رلیز کے مطابق، پی پی پی چیئرمین نے پیپلز پارٹی کی حمایت یافتہ پیپلز لیبر یونین کے نومنتخب سید لعل حسین شاہ اور جنرل سیکریٹری شیر محمد بلوچ سمیت تمام کامیاب امیدواروں کو مبارکباد دی ہے۔ انہوں نے پورٹ قاسم اتھارٹی سی بی اے میں پیپلز لیبر یونین کی کامیابی کے لیے کاوشوں پر پیپلز لیبر بیورو کے صدر حبیب الدین جنیدی، جنرل سیکریٹری سید فیاض شاہ اور کراچی ڈویڑن کے صدر اسلم سموں کو بھی خراج تحسین پیش کیا ہے۔ چیئرمین بلاول بھٹو زرداری نے اس امید کا اظہار کیا کہ پیپلز لیبر یونین کے نومنتخب عہدیداران و کارکنان اب مزید جذبے اور عزم کے ساتھ محنت کریں گے اور پورٹ قاسم اتھارٹی کے مزدوروں کو طاقتور بنائیں گے۔ انہوں نے پورٹ قاسم اتھارٹی کے محنت کشوں سمیت ملک بھر کے مزدوروں سے مخاطب ہوئے کہا کہ پاکستان پیپلز پارٹی محنت کشوں کی نمائندہ جماعت ہے، جو مزدوروں کے حقوق کے تحفظ اور ان کی خوشحالی کے ایجنڈا پر کسی مصلحت کا شکار نہیں ہوگی۔