پاکستان پیپلز پارٹی کے چیئرمین بلاول بھٹو زرداری نے 5 جولائی کو ایک آمر کی جانب سے ملک کے پہلے منتخب وزیر اعظم شہید ذوالفقار علی بھٹو کی حکومت پر شب خون مارنے کو ملکی تاریخ کا سیاہ دن قرار دیا ہے۔ میڈیا سیل بلاول ہاو ¿س کی جانب سے جاری کردہ پریس ریلیز کے مطابق، پی پی پی چیئرمین نے اپنے پیغام میں کہا کہ قائد عوام شہید ذوالفقار علی بھٹو کی منتخب حکومت گرانے کے نتیجے میں ملک کو بھاری قیمت ادا کرنی پڑی ہے۔ ملکی تاریخ کے اس سیاہ دن نے ہماری قوم کو انتہا پسندی، دہشت گردی اور کلاشنکوف و منشیات کی مصیبتوں سے دوچار ایک ایسے راستے پر کھڑا کر دیا جن سے ہم آج بھی نبرد آزما ہیں۔ انہوں نے کہا کہ اس طرح کے بے پناہ مصائب برداشت کرنے کے باوجود، ہمارے درمیان اب بھی کچھ ایسے لوگ موجود ہیں جو جمہوریت کو نقصان پہنچانے کے لئے ہر وقت تاک میں رہتے ہیں۔ چیئرمین بلاول بھٹو زرداری نے کہا کہ جنرل ضیائ الحق کی جابر انہ حکومت نے پاکستان کے جمہوریت پسندوں، لبرلز اور سچے محب وطن لوگوں کے خلاف بربریت کو بے لغام کر رکھا تھا۔ انہوں نے مزید کہا کہ جمہوریت پسند پاکستانیوں کو قید و بند اور کوڑے مارنے کی سزاوَ اور جلاوطنی کی اذیتیں دینے کے علاوہ پھانسی کا نشانہ بنایا جاتا رہا۔ انہوں نے کہا کہ آج کے نوجوان اس دور میں جیالوں کو درپیش مشکل حالات کا تصور بھی نہیں کرسکتے۔ ان گھناو ¿نے انتقامی کارروائیوں اور آمرانہ حکومت کی دہشت گردی کے باوجود پاکستانی عوام، خاص طور پر جیالوں کا عزم و جذبہ غیر متزلزل رہا۔ وہ ثابت قدم رہے اور جمہوریت کی بحالی کے لیے اٹل ارادے اور حوصلے کے ساتھ لڑتے رہے۔ انہوں نے مزید کہا کہ آج ملک میں جمہوریت ہے تو یہ پاکستان پیپلز پارٹی کے قائدین اور کارکنوں کی قربانیوں کی وجہ سے ہے۔ چیئرمین بلاول بھٹو زرداری نے کہا کہ قوم آج کے جمہوریت کی خاطر بے پناہ مصائب برداشت کرنے والوں کی قربانیوں کو یاد کرتی ہے، اور ہم ان اقدار کی پاسداری کے عزم کی تجدید کرتے ہیں جن کے لیے قائدِ عوام شہید ذوالفقار علی بھٹو اور ان گنت دیگر لوگوں نے بڑی بہادری سے جدوجہد کی۔ آئیے ہم ایک جمہوری، ترقی پسند اور منصفانہ پاکستان کے لیے جدوجہد جاری رکھتے ہوئے ان کی لیگیسی کو خراج عقیدت پیش کریں۔