| پاکستان پیپلز پارٹی کے چیئرمین بلاول بھٹو زرداری نے یومِ دفاع کے موقع پر اپنے پیغام میں ملک کے دفاع کے لیے اپنی جانیں نچھاور کرنے والے بہادر جوانوں کو خراجِ عقیدت پیش کیا ہے۔ انہوں نے مسلح افواج کی جرات اور قربانیوں کو سراہتے ہوئے کہا کہ ان کی بہادری ملک کے لیے باعثِ فخر و حوصلہ ہے۔میڈیا سیل بلاول ہاوَس سے جاری کردہ پیغام کے مطابق، پی پی پی چیئرمین نے کہا کہ 6 ستمبر کا دن قوم کو ایک بار پھر اس جذبہ? استقامت اور حب الوطنی کی یاد دلاتا ہے جو ہمیں یکجا کرتا ہے۔ ہماری مسلح افواج نے ہمیشہ چیلنجز کے سامنے ڈٹ کر مقابلہ کیا ہے، اپنی سرحدوں کی حفاظت کی اور ہماری خودمختاری کو برقرار رکھا ہے، ہمارے شہداء اور غازیوں کی قربانیاں قوم کے دلوں میں نقش ہیں، اور وطن کے لیے ان کی غیر متزلزل وابستگی ہر پاکستانی کے لیے طاقت کا سرچشمہ ہے۔چیئرمین بلاول بھٹو زرداری نے زور دیا کہ پاکستان کی سلامتی اور استحکام کا انحصار نہ صرف اس کی افواج کی طاقت پر ہے بلکہ اس کے عوام کی یکجہتی پر بھی ہے۔ عوام اور افواج کے درمیان یکجہتی ہی ہمیں ناقابلِ تسخیر بناتی ہے۔ انہوں نے زور دیا کہ پوری قوم مل کر پاکستان کی خوشحالی اور دفاع کے لیے کام جاری رکھے۔انہوں نے، یوم دفاع کے موقع پر، قائدِ عوام شہید ذوالفقار علی بھٹو کو بھی خراجِ عقیدت پیش کیا جنہوں نے پاکستان کے جوہری پروگرام کی بنیاد رکھی اور آنے والی نسلوں کے لیے ملک کی دفاعی صلاحیتوں کو یقینی بنایا۔ چیئرمین بلاول بھٹو زرداری نے مزید کہا کہ پاکستان کی دفاعی ٹیکنالوجی میں ترقی، بشمول بیلسٹک میزائل ٹیکنالوجی کا تحفہ، شہید محترمہ بینظیر بھٹو کی بصیرت کا نتیجہ ہے، جن کی دوراندیشی آج بھی ملک کی خودمختاری کی حفاظت کر رہی ہے۔ چیئرمین پی پی پی نے اپنے پیغام میں مسلح افواج اور ان کے خاندانوں کی فلاح و بہبود کے عزم کا اعادہ کیا اور قومی اتحاد، نگاہ بانی اور ملک کے دفاع اور ترقی کے لیے مسلسل محنت کی اہمیت پر بھی زور دیا ہے۔ |
