اسلام آباد (13 اگست 2022)
 سابق صدر پاکستان اور پاکستان پیپلز پارٹی پارلیمنٹیرینز کے صدر آصف علی زرداری نے یوم آزادی پر قوم کے نام اپنے پیغام میں کہا ہے کہ عوام کی منتخب پارلیمنٹ کی بالادستی آزاد، خود مختار اور باوقار حکومت کے لیے ضروری ہے۔ آصف علی زرداری نے کہا کہ قائداعظم محمد علی جناح نے ایک آزاد مملکت کے طور پر پاکستان کی بنیاد رکھی۔ قائد عوام شہید ذوالفقار علی بھٹو نے 1973 کا متفقہ آئین دے کر پاکستان کو ایک مضبوط اور مستحکم ملک بنایا جو آج بھی وفاق کی تمام اکائیوں کے درمیان اعتماد اور بندھن کی علامت ہے۔ آصف علی زرداری نے کہا کہ آمروں نے اقتدار کے لیے آئین کو توڑ مروڑ کر پیش کیا لیکن ناکام رہے۔ انہوں نے کہا کہ بااختیار پارلیمنٹ ہی ملک و قوم کے مستقبل کا فیصلہ کر سکتی ہے۔ صدر زرداری نے کہا کہ شہید محترمہ بینظیر بھٹو نے اپنے خون سے وفاق اور تمام اکائیوں کے درمیان اتحاد و یکجہتی کے معاہدے کو مستحکم کیا۔ انہوں نے کہا کہ 18ویں ترمیم مضبوط اور مستحکم پاکستان کی ضمانت ہے۔ اب وقت آگیا ہے کہ میثاق جمہوریت پر مکمل عمل درآمد کرتے ہوئے ملک و قوم کے لیے پائیدار فیصلے کیے جائیں۔ ملک کی تمام جمہوری سیاسی جماعتیں پارلیمنٹ کو بااختیار بنانے کے لیے متحد ہو جائیں۔