صدر مملکت آصف علی زرداری نے فلسطینی عوام کے حق ِخودارادیت کیلئے پاکستان کے غیر متزلزل عزم کا اظہار کرتے ہوئے کہا ہے کہ پاکستان فلسطینیوں کے ناقابل تنسیخ حقِ خودارادیت کی حمایت کے لیے پرعزم ہے، اسرائیلی دیدہ دلیری اور خطے کے دیگر ممالک کے خلاف مسلسل جارحیت پورے خطے کے امن و استحکام کو خطرے میں ڈال رہی ہے، آزادی، وقار اور انصاف کیلئے فلسطینی عوام کی جائز جدوجہد میں ان کے ساتھ کھڑے ہیں، عالمی برادری فلسطینی عوام کی نسل کشی روکنے کے لیے فوری اور فیصلہ کن اقدامات کرے۔ صدر مملکت نے ان خیالات کا اظہار فلسطینیوں کے ساتھ یکجہتی کے عالمی دن جو جمعہ 29 نومبر کو منایا جارہا ہے کے موقع پر اپنے پیغام میں کیا۔ انہوں نے کہا کہ یہ دن ایک ایسے وقت میں منایا جا رہا ہے جب اسرائیل کی جانب سے جاری فوجی مہم غزہ اور دیگر مقبوضہ فلسطینی علاقوں میں نسل کشی، بنیادی ڈھانچے اور رہائشی علاقوں کی تباہی، مصائب اور فلسطینیوں کی نقل مکانی کا باعث بن رہی ہے۔ صدر مملکت نے کہا کہ پاکستان 1967ئ سے قبل کی سرحدوں کے مطابق ایک ایسی آزاد، پائیدار اور متصل فلسطینی ریاست کے قیام کا حامی ہے جس کا دارالحکومت القدس شریف ہو۔ صدر مملکت نے کہا کہ یہ دن ایک ایسے وقت میں منایا جا رہا ہے جب اسرائیل کی جانب سے جاری فوجی مہم غزہ اور دیگر مقبوضہ فلسطینی علاقوں میں نسل کشی، بنیادی ڈھانچے اور رہائشی علاقوں کی تباہی، مصائب اور فلسطینیوں کی نقل مکانی کا باعث بن رہی ہے۔ انہوں نے کہا کہ گزشتہ سال کے دوران عالمی انسانی قوانین کی صریح خلاف ورزی میں اسرائیلی اقدامات کی وجہ سے بچوں اور خواتین سمیت 45 ہزار سے زائد فلسطینی اپنی جانیں کھوچکے ہیں۔ صدر مملکت نے کہا کہ اسرائیل کی جانب سے اقوام ِمتحدہ کی ریلیف اینڈ ورکس ایجنسی برائے فلسطینی پناہ گزینوں کے ساتھ ساتھ دیگر امدادی ایجنسیوں کے کام میں رکاوٹیں ڈال کر لاکھوں فلسطینیوں کو زندگیاں بچانے والی انسانی امداد سے جان بوجھ کر محروم کیا جا رہا ہے۔ آصف علی زرداری نے کہا کہ اسرائیلی دیدہ دلیری اور خطے کے دیگر ممالک کے خلاف مسلسل جارحیت پورے خطے کے امن و استحکام کو خطرے میں ڈال رہی ہے۔ انہوں نے کہا کہ پاکستان ان جارحانہ کاروائیوں کی شدید مذمت کرتا ہے اور عالمی برادری پر زور دیتا ہے کہ وہ فلسطینی عوام کی نسل کشی روکنے کے لیے فوری اور فیصلہ کن اقدامات کرے۔ صدر مملکت نے کہا کہ عالمی ضمیر اسرائیلی قبضے کی وجہ سے شدید مشکلات کا سامنا کرنے والے لاکھوں لوگوں کی حالت زار نظر انداز نہیں کرسکتا۔ انہوں نے کہا کہ ہم سمجھتے ہیں کہ جاری اسرائیلی قبضہ اور بین الاقوامی قوانین کی مسلسل بے توقیری خطے میں قیام ِامن کی راہ میں سب سے بڑی رکاوٹ ہے۔ صدر مملکت نے کہا کہ آج پاکستان عالمی برادری بالخصوص اقوام متحدہ کی سلامتی کونسل سے غزہ میں فوری اور غیر مشروط جنگ بندی، لاکھوں فلسطینیوں کے مصائب کم کرنے کے لیے بلا روک ٹوک انسانی امداد کی فراہمی کے ساتھ ساتھ اسرائیل کو اس کے اقدامات پر جوابدہ ٹھہرانے کے مطالبے کا اعادہ کرتا ہے۔ صدر مملکت نے کہا کہ اسرائیلی اقدامات کو عالمی عدالت انصاف نے بجا طور پر ”قرین ِقیاس نسل کشی“ قرار دیا ہے، پاکستان اس سلسلے میں اسرائیل اور اس کی قیادت کے احتساب کے لیے تمام اقدامات کا خیرمقدم اور حمایت کرتا ہے، آج کا دن فلسطینی عوام کے لیے انصاف اور مساوات یقینی بنانے کے لیے ہماری مشترکہ ذمہ داری کی زوردار یاد دہانی ہے۔ انہوں نے کہا کہ پاکستان فلسطین کی حمایت جاری رکھے گا اور وہ فلسطینیوں کے ناقابل تنسیخ حقِ خودارادیت کی حمایت کے لیے پرعزم ہے